پندرہ جولائی ۲۰۱۶ء کی رات ترکی میں عوام نے ایک آزاد ملک کی حیثیت سے زندگی اور موت کی جنگ لڑی اور یہ قوم اِس جنگ سے اپنی جانوں کے نذرانے پیش کرکے کامیابی سے ہمکنار ہوئی۔ اِس جنگ کے فسانۂ غم ہم سنا سنا کے روئے مگرروتے ہوئے بھی ہمارے سر فخر سے بلند تھے کیونکہ اِس قوم کے بہادراور نڈر نہتے عوام نے اپنے سامنے کھڑی باغی فوج، جس کے پاس عصر حاضر کے جدید ترین ہتھیار موجود تھے، کو اپنے ایمان کی قوّت سے ہرادیا۔اُس رات اللہ تعالیٰ نے اِس ملک کے عوام کے دلوں سے خوف و ہراس کو بالکل اُٹھا لیا اور اُن غداروں کے دلوں پر خوف و ہراس کی لہریں دوڑادیں۔ کیونکہ یہ قوم اپنے سامنے اُن غداروں کے ٹینکوں کے نیچے دب کر ٹکڑے ٹکڑے ہونے والے لوگوں یعنی اِس قوم کے شہیدوں کو دیکھ کر بھی نہیں ڈری اوراُن باغیوں پر حملہ کرتی رہی مگر وہ ملک و قوم کے دشمن باغی اپنے ٹینکوں کے ناکارہ ہونے کے بعد جب باہر نکلنے پر مجبور ہوئے تو وہ ڈر کے مارے کانپ کانپ کر رو رہے تھے کہ ہمیں معاف کردیں، ہم اپنے کمانڈروں کے احکامات کی تعمیل کررہے تھے!
۱۵ جولائی ۲۰۱۶ء کی رات ترکی میں جو خونی بغاوت ہوئی اب اِس میں کوئی شک و شبہ تک کی گنجائش نہیں رہی کہ اُس کے پیچھے امریکا کے معزز و محترم مہمان فتح اللہ گولن کارفرما ہیں، جنھوں نے اپنے مہماندارملک کے مالکوں کے حق مہمانداری کی ادا ئیگی یا اُن کے دلوں کومسرت سے لبریز کرنے کے لیے یا شاید اپنے آقاؤں کا حکم بجا لانے کے لیے ترک فوج اور پولیس میں موجود اپنے کارکنوں، جو سالوں سے اِس ایما کے لیے چشم براہ تھے، کو ترکی میں بغاوت شروع کرانے کاحکم جاری کیا۔ اِس حکم کی تعمیل کے لیے ترک فوج میں موجود امریکا کے اِس عزیز مہمان کے کارکن جن کی ذہن سازی سالوں سے گولن کے اسکولوں، خدمت تحریک کے اماموں کے حلقۂ درس و تدریس یا نورخانوں میں ہورہی تھی، اِن تعلیمات کے زیر اثر اُن باغیوں نے ۱۵ جولائی ۲۰۱۶ء کی رات کو آنکھ جھپکے بغیر ترک عوام کے قتل عام کا سلسلہ شروع کیا۔مگر فتح و نصرت مظلوموں کو ہوئی۔ اِس بغاوت کی ناکامی کے بعد گرفتار ہونے والے فوجی جنرلوں نے گولن تحریک سے اپنے روابط کا اظہار کیا۔ پھر امریکا کے عزیز مہمان نے اپنے انٹرویو کے ذریعے اِس جرم سے انکار کرتے ہوئے بھی اِس خونی بغاوت میں شرکت کرنے والوں کے ساتھ اپنی ہمدردی اور حمایت کا اظہار کرکے ترک عوام کو دھمکیاں اور بددعائیں دے کر اِس جرم کا اقرار کیا، مزید بر آں امریکا کے جنرلوں نے یہ اعلان کیا کہ ترکی میں ’’ہمارے دوستوں‘‘ یعنی باغی جنرلوں کی گرفتاری ہورہی ہے، جس کی وجہ سے ہم سخت مایوس ہیں۔ خیر صدر جناب رجب طیب ایردوان کی سخت تنقید اور رد عمل کے بعد وہ لوگ اپنی باتوں سے مکرگئے مگر بات تیر کی طرح ہوتی ہے ایک دفعہ کمان سے نکل گئی تو پھر وہ واپس نہیں آتی۔ جب کہ فتح اللہ گولن حق مہمان نوازی ادا کررہے ہوں تو اِن کارآمد عزیز مہمان کے لیے مہمان پروری کا جوہر کیوں نہ دکھائے؟
اب میں قارئین کرام سے گزارش کرتا ہوں کہ وہ ایک پل ٹھہریں اور آگے پیچھے تمام سنی سنائی باتوں کو اور بالخصوص اپنے اپنے ملکوں کے تجزیہ کاروں کے مغربی میڈیا اور ’’خدمت تحریک‘‘ کے مبلغوں کی کامیابی سے پڑھی پڑھائی باتوں کے سحر میں آکر لکھے گئے تجزیوں اور تبصروں کو ایک طرف کرکے ذرا سوچیں کہ ایک ملک جس میں ایک بیرونی ملک میں مہمان ایک شخص کے حکم سے اُس ملک کی فوج کا ایک اہم ٹولہ بغاوت کرے اور وہ لوگ احتجاجی لوگوں کا قتل عام شروع کرادیں اور پھر بغاوت کی رات باغی کمانڈروں کے حکم سے فوج کے اسپیشل فورس کے بہترین سپاہیوں کے چالیس افراد پر مشتمل ایک ٹولے کو صدر مملکت کو قتل کرنے کی غرض سے اُن کے ہوٹل پر قاتلانہ حملہ کریں اور پھر اُن کے پاس سے وہ فہرست بر آمد ہو جس میں صدر مملکت کے ساتھ، وزیراعظم اور ترک حکومت کی دیگر اہم ہستیوں کے نام لکھے ہوں، جن کے لیے باغیوں نے جہاں ملیں وہاں ختم کیے جائیں کا حکم بھی جاری کیا ہو۔ اِس بدترین صورتحال کو دیکھ کر اُس ملک کی حکومت کیا کرے؟
کیا وہ حکومت اُن سب کی آؤ بھگت کرکے اُن باغیوں سے گلے لگے گی کہ شاباش میرے بیٹو! آپ سب نے فوجی بغاوت کرکے اور نہتے عوام کے خون سے سڑکوں کو نہلاکر بڑا کارنامہ انجام دیا؟ کیا اِس قسم کے نامعقول برتاؤ کی توقع دنیا کی کسی بھی حکومت سے کی جاسکتی ہے؟ ظاہر ہے کہ اِس کا جواب نفی میں ہوگا۔ کیونکہ دنیا میں کسی بھی ملک میں اِس طرح کی کوئی بھی بغاوت ہو تو اُس کی روک تھام کے لیے ارباب اقتدارکو سخت اقدامات کرنے ہی ہوتے ہیں اور اکثر ملکوں میں رد عمل میں خونی انتقامی کارروائیاں ہوتی ہیں، جن کی وجہ سے سیکڑوں یا ہزاروں افراد ہلاک کیے جاتے ہیں۔ اب بچے بچے تک کو علم ہے کہ انسانی حقوق کی آواز بلند کرنے والے امریکا اور مغربی ممالک نے نائن الیون کے واقعے کے بعد نہ صرف اپنے ملکوں کے اندر بلکہ تمام دنیا میں ’’دہشت گردوں‘‘ کا شکار شروع نہیں کرایاجس کی وجہ سے افغانستان، یمن اور عراق میں لاکھوں بے گناہوں کا خون بہا یا گیا؟پھر امریکا جو دنیا کی پہرہ داری کرکے انصاف و عدل بانٹنے کا مدعی ہے، کیا اُس میں سیاہ فام لوگ بر سر عام امریکی پولیس کے ہاتھوں قتل نہیں ہوتے، وہ بھی صرف اِس شبہ میں کہ شاید اُن کے پاس پستول یا کوئی اور اسلحہ ہو!
جب امریکا یا مغرب کا کوئی ترقی یافتہ، انسانی حقوق کا علمبردار ملک خواہ غیر انسانی کیوں نہ ہو ایک ایسا اقدام کرے تو تمام مغربی میڈیا اور مشرق میں اُن کے ہمنوا صحافی اِس کے لیے جواز نکال ہی لیتے ہیں اور اُس کو حق بجانب ٹھہراتے ہیں، مگر ترکی کے صدر جناب رجب طیب ایردوان یا ترک حکومت اپنے ملک و ملت کی حفاظت کے لیے کوئی بھی قدم اُٹھائیں تو مغرب سے لے کر مشرق تک، (کہتے ہوئے مجھے بہت افسوس اور دلی دکھ ہوتا ہے مگر ترکی کے دوست اور برادر ملک پاکستان میں بھی) ایسی نامعقول احتجاجی آوازیں بلند ہوتی ہیں کہ خدا کی پناہ! جیسے ایک ہی چشمہ سے نکلنے والے پانی کی طرح سب کا رنگ ڈھنگ اور ذائقہ ایک ہے کہ ’’یہ رجب طیب ایردوان کا تیار کردہ ایک ڈراما ہے، یہ رجب طیب ایردوان کی انتقامی کارروائی ہے اور یہ رجب طیب ایردوان کی اپنے اقتدار کی بنیادیں مضبوط کرنے کے لیے کی ہوئی ایک سازش ہے اور ترکی حکومت جو حفاظتی اقدامات کررہی ہے وہ سب رجب طیب ایردوان کی آمریت کی راہ ہموار کرنے کے لیے ہیں!‘‘ یہ سب محیر العقول اور بے بنیادالزامات ایسے ایسے پڑھے لکھے اور تجربہ کار افراد کے منہ سے سنائی دے رہے ہیں کہ اگر میں ترکی میں سالوں سے ہونے والے واقعات کا چشم دید گواہ نہ ہوتا تو شاید اُن کے الزامات کی سچائی پر یقین کرتا۔ میں فرصت ملنے پر اپنے پیارے تجزیہ کاراور میڈیا سے تعلق رکھنے والے دوستوں کے لیے ’’آمریت کا مفہوم اور اردو میڈیا میں پھیلائی ہوئی غلط تشریحات‘‘ سے متعلق ایک تحریر لکھوں گا مگر وہ بعد کی بات ہے۔اور فی الوقت اِس سے زیادہ اہم موضوعات موجود ہیں۔
اب آیے ترکی حکومت نے کیا کیا اقدامات کیے، جن کی وجہ سے مغربی حکومتیں اور میڈیا اور اردو میڈیا کا ایک اہم گروہ ترک حکومت اور جناب رجب طیب ایردوان کو موردِ الزام قرار دیتے ہیں، اُن کی طرف ذرا توجہ دیتے ہیں۔
ترک حکومت نے اورنہ ہی ترکی کے عوام نے کوئی بھی انتقامی کارروائی کی ہے۔ فوجی باغیوں نے ساٹھ ستر پولیس اہلکار اور تقریباً ایک سو ستر عام شہریوں کو وحشیانہ انداز میں قتل کیا، اِس کے باوجود گرفتار ہونے والے باغیوں میں سے کسی ایک کو بھی نہ مارا گیا نہ ہی اُن پر تشدد کا سلسلہ شروع کیا۔ فوجی باغیوں میں سے صرف چوبیس پچیس لوگ مارے گئے، وہ بھی اُن کے پولیس اہلکاروں اور حکومت کے حامی فوجیوں سے جھڑپوں میں نہ کہ گرفتار ہونے کے بعد۔ گرفتار ہونے والے فوجیوں میں سے کچھ فوجیوں کی مار پیٹ تو ہوچکی تو وہ الگ بات ہے مگر اپنے یار دوستوں کو بے رحمانہ انداز میں قتل ہوتے ہوئے دیکھ کر لوگ اُن کا اجتماعی قتل بھی کرسکتے تھے، لیکن پولیس اہلکاروں نے اور باشعور شہریوں نے حملہ کرنے والوں کو منع کیا کہ ’’یہ وطن کی اولاد ہیں!‘‘
پچھلے ہفتے مغربی ممالک کے آلۂ کار انسانی حقوق کے ایک بین الاقوامی ادارے نے جلدی سے ایک رپورٹ شائع کی کہ گرفتار فوجیوں کے ساتھ غیر انسانی سلوک کیا جاتا ہے، اُن کو دو دن میں ایک بار کھانا دیا جاتا ہے اوراُن کے ساتھ جنسی بدسلوکی کی جاتی ہے۔امریکا کی ہر بدسلوکی سے چشم پوشی کرنے والے اِس ادارے نے یہ بھی اعلان کیا ہے کہ ہمارے پاس سیکڑوں تصویریں موجود ہیں۔ماشاء اللہ ایک دو دن میں ترکی کے جیلوں سے سیکڑوں تصویریں وصول کرنے والے اِس ادارے کو (جیسے وہ کسی بہت ہی پُر اثر ترک خفیہ ایجنسی کا ایک پرزہ ہے) شاید یہ علم نہیں کہ ترک پولیس اور فوجی امریکی فوجی نہیں۔جنسی بدسلوکی، عصمت دری یا آبرو ریزی کا تعلق اِس قوم سے نہ ماضی میں ہوا، نہ آج ہے اور انشاء اللہ نہ ہی مستقبل میں ہوگا۔آج کل فوجی بغاوت میں شامل عام سپاہیوں اور ترکی فوجی ہائی اسکول یا کیڈٹ اسکولوں کے طالب علموں کو پوچھ گچھ کے بعد رہا کردیا گیا ہے کہ عسکری تعلیم کے زیر اثر رہ کر وہ اپنے کمانڈروں کے احکامات کی تعمیل کررہے تھے۔ اگر یہ لوگ کسی اور ملک میں ہوتے تو اُن کو کبھی اِس آسانی سے رہا کردیا جاتا؟ یہاں ظلم و تشدد کا سوال ہی پیدا نہیں ہوتا لیکن جس طرح ہمارے ہاں کہتے ہیں: ’’مجرم دوسروں کو بھی اپنی طرح مجرم سمجھے‘‘۔ شاید وہ بین الاقوامی ادارہ بھی اِسی غلط فہمی میں مبتلا ہوگا!
ترکی کی منتخب حکومت نے جو اقدامات کیے اُن کی فہرست کچھ یوں ہے:
ترکی فوج میں ۱۴۹ جنرل، ۱۰۹۹ افسر اور ۴۳۶ پیٹی افسر اور عدالت میں ۲۷۴۵ جج اور سرکاری وکیل اور عدالت عظمیٰ کے ۱۸۸ ارکان کو یا برطرف کردئیے گئے یا تحقیقات کے خاتمہ تک معطل کردیے گئے۔
۱۶ ٹی وی چینل، ۳ نیوز ایجنسی، ۴۵ اخبار، ۲۳ ریڈیو چینل، ۱۵ مجلے اور ۲۹ اشاعت گھر، ۱۵ یونیورسٹیاں، ۹۳۴ تعلیمی ادارے اور ۳۵ ہسپتال یا ڈسپنسری میں سے کچھ بند ہوئے، کچھ سرکاری اداروں میں ضم کیے گئے یا اُن کو سرکاری نگرانی میں دے دیا گیا۔
ترکی کی وزارتِ عظمیٰ سے لے کر وزارتِ تعلیم اور وزارت داخلہ تک کی مختلف وزارتوں کے پچاس ہزار سرکاری ملازم برطرف کردیے گئے ہیں یا معطل۔
اِس طرح ترکی کی چار یونیورسٹیوں کے ریکٹر یا چانسلر گرفتار ہوئے اورمختلف یونیورسٹیوں میں سے نو سو اساتذہ یا ملازم معطل کردیے گئے ہیں، جن میں سے ابھی تک چالیس پچاس افراد گرفتار ہوئے ہیں۔ ترکی کے تمام شعبہ جات کے ڈین صاحبان سے مستعفی ہونے کا مطالبہ کیا گیا ہے۔
واضح رہے کہ یہ تمام لوگ اور ادارے یا تنظیم وہ براہ راست یا بالواسطہ اِس خونی بغاوت سے تعلق رکھنے والے لوگ ہیں۔ وہ جو براہ راست اِس بغاوت میں شامل تھے اور جنھوں نے نہتے لوگوں کے قتل عام میں حصہ لیا تھا وہ تو گرفتار ہوئے اور اُن میں سے اکثر و بیشتر فوجی اور پولیس کے غدار اہلکار ہیں۔ وہ جو جج اور سرکاری ملازم ہیں، اُن میں سے کچھ پکڑے جانے والے گولن تنظیم کے اہم ملزموں کو اِس جنگ کے دوران بھی رہا کروانے والے ہیں یا جن کے باغی فوجیوں کے ساتھ تعلقات کے مبینہ ثبوت ہیں اور بغاوت کی کامیابی کی صورت میں مختلف اہم عہدوں کے لیے جن کی تقرریاں طے ہوگئی تھیں۔گرفتار ہونے والے صحافی تو صرف سات ہیں جن کا امریکا کے پیارے مہمان سے براہ راست رابطہ ہے اور وہ جو تین چار سالوں سے لوگوں کو حکومت کے خلاف بغاوت کے لیے اکسانے والی تحریریں قلم بند کررہے تھے یا پھر ترکی کی قومی سلامتی کے لیے اہم فوجی یا سرکاری معلومات کو غیرملکی ایجنسیوں کو پہنچارہے تھے۔
یونیورسٹیاں تو میرے سامنے ہیں کیونکہ میں بھی یونیورسٹی کا استاد ہوں۔ اعلیٰ تعلیمی کمیشن نے تمام ڈین صاحبان سے مستعفی ہونے کا مطالبہ اِس لیے کیا ہے کہ اگر اُن کو ہائیر ایجوکیشن کمیشن نے برطرف کردیا ہوتا تو قانون کی رو سے اُن کی بحالی ناممکن تھی۔ اگر وہ خود مستعفی ہوگئے تو بعد میں اُن کی اپنے عہدے پر تقرری کا امکان ہے۔ اِس طرح یونیوسٹیوں سے معطل ہونے والے اساتذہ بھی دو دو ماہ کے لیے معطل کردئیے گئے ہیں اس دوران اُن کو اپنی تنخواہ کا دو تہائی حصہ ملتا رہے گا۔اگر تحقیقات کے بعد وہ بے گناہ ثابت ہوں گے تو اُن کی بحالی ہوگی اور اگر اِس بغاوت میں کسی طرح سے بھی ملوث ثابت ہوں گے تو تب اُن کی برطرفی عمل میں آئے گی۔ اگر یہ کوئی انتقامی کارروائی ہے تو جب بہت سے ملکوں میں عام انتخابات کے بعد اقتدار ایک پارٹی سے دوسری پارٹی میں منتقلی کے ساتھ ہی نئی حکومتیں سرکاری اداروں میں اِس سے زیادہ تبدیلیاں کرکے مختلف اداروں میں اپنی پارٹی کارکنوں کو بھرتے ہیں تاکہ وہ ملک کا نظم و نسق اپنے ہاتھوں میں لے سکیں۔
ترکی میں ایک خونی بغاوت ہوئی ہے، ڈھائی سو شہری شہید ہوئے ہیں اور دو ڈھائی ہزار زخمی ہیں اور غداروں نے صدر اور وزیر اعظم پر قاتلانہ حملہ کیا ہے، اِس بغاوت کی ناکامی کے بعد ترکی حکومت نے کچھ ضروری حفاظتی اقدامات کیے۔
ترکی میں بر طرف اور معطل ہونے والوں کی اِس تعداد کو دیکھ کر باہروالے سمجھ ہی نہیں پارہے ہیں کہ یہ کیا چکر ہے اور برطرفیاں کیوں ہورہی ہے؟ میں اُن کی خدمت میں یہ عرض کرنا چاہتا ہوں کہ یہ تعداد کم بھی ہے۔ کیونکہ یہ ایک ایسی تنظیم ہے جو تقریباً تیس چالیس سالوں سے ترکی کے سرکاری اور غیرسرکاری جسم میں ایک مہلک وبا کی طرح پھیل چکی ہے، جس کا علاج بہت ہی مشکل ہے۔اِس سے ایک ماہ قبل ترکی میں صورتحال کو دیکھ کر میں سوچتا تھا کہ شاید اِس کا علاج ناممکن ہے۔ کیونکہ گولن تنظیم یا ’’خدمت تحریک‘‘ کی شاخیں ترکی کی تمام وزارتوں میں اور عدالت سے لے کر فوج تک کے تمام اداروں میں ایسے جڑ پکڑ چکی تھیں کہ اُن کو دیکھ کر دل ہی دل میں میں کہہ رہا تھا کہ اللہ تعالیٰ ہمارے صدر کی مدد کرے کیونکہ وہ کچھ نادان لوگوں کے گھیرے میں ہیں۔یہ بات نہ صرف میں بلکہ بہت سے شہری پوچھ رہے تھے کہ یہ کیا چکر ہے۔ ۱۵ جولائی ۲۰۱۶ء کی رات کے بعد اب اِس میں کوئی شک نہیں رہا کہ ترکی کے عوام اپنے خیالات میں کس قدر حق بجانب تھے۔ کیونکہ سرکار کے کچھ لوگ براہ راست اِس بغاوت میں شامل ہوئے، کچھ لوگ اپنے مفادات اور اپنے اپنے عہدوں کے تحفظ کی خاطر اِس تحریک کی سرگرمیوں سے چشم پوشی کرتے رہے تھے ، کچھ لوگ اِس تنظیم کی طاقت اور اثر رسوخ سے خائف ہوکر خاموشی اختیار کرلیتے تھے اور کچھ لوگ صدر اور منتخب حکومت کے وفادار ہونے کے باوجود دوسرے گروہوں کے فریب میں مسحور آنے والی قیامت کا پتہ نہیں چلا سکے۔
میں ایک پروفیسر ہونے کی حیثیت سے پھر دہراؤں گا کہ یونیورسٹیاں اور علمی و فنی ادارے میرے در پیش ہیں۔ اِس تحریک کے لوگ یونیورسٹیوں میں جہاں کسی عہدے پر فائز ہوئے وہیں صرف اپنے ہی لوگوں کو بھرتی کرنے لگے۔ ہماری یونیورسٹی میں جب اُن میں سے ایک ریسرچ انسٹی ٹیوٹ کے مدیر ہونے والے صاحب نے مدیر ہونے کے بعد اُس انسٹی ٹیوٹ کی تمام اسامیاں اپنے لوگوں میں تقسیم کیں۔ اِس طرح کئی شعبہ جات میں صدر شعبہ ہونے پر اُن لوگوں نے اپنے ہی لوگوں کو رکھنا شروع کیا۔ پھر آپ سوچیے جہاں جہاں وہ لوگ چانسلر اور وائس چانسلر بنے وہاں کی اکثر و بیشتر اسامیوں کے حقدار کون کون لوگ ٹھہرائے گئے؟ اُن میں سے ایک صاحب کی تقرری ترکی کے سب سے اعلیٰ علمی اور تحقیقی کونسل کے مدیر کی حیثیت سے ہوئی، تو اُنھوں نے کونسل میں چائے بنانے والے ملازموں تک کو نکال کر اپنی ہی تحریک کے لوگوں کو نکالے ہوئے لوگوں کی جگہ بھرتی کر لیا۔ باقی!!! باقی آپ ہی سوچیے کہ یہ تحریک کس طرح ترکی میں جائز یا ناجائز طریقے سے پھیلتی گئی۔
مسئلہ ایسا پیچیدہ اور راز دارانہ ہے کہ اگر اِس تحریک کے طریق کار اور حربوں کی تفصیل لکھنے لگیں تو ایک نہیں کئی جلدوں پر مشتمل ایک کتاب بن جائے۔ اِس لیے آخر میں میں ترک فوج کی برطرفیوں کی جانب آنا چاہوں گا ۔
ترک فوج میں ۱۴۹ جنرل، ۱۰۹۹ افسر اور ۴۳۶ پیٹی افسر بر طرف کیے گئے اور اُن میں سے اکثر گرفتار ہوئے۔ اِسی طرح فوجی اسکولوں یعنی ایک طرح اکثر و بیشتر طالب علموں نے بھی اِس بغاوت میں شامل ہونے کی کوشش کی مگر ترکی کے غیور عوام نے اِن اسکولوں کو گھیرے میں لے کر اُنھیں اپنے اپنے اسکولوں میں بند کررکھا اور باہر نکلنے نہیں دیا۔اِس طرح ایف ۱۶ کے کئی پائلٹ بر طرف ہوئے۔
واضح رہے کہ فوج کا یہ کثیر تعداد کا باغی ٹولہ ترکی لشکر کے سیکولر عناصر پر مشتمل نہیں تھا۔ کیونکہ اِس مرتبہ ترکی کے سیکولر عناصر اور کمانڈروں نے بھی اِس بغاوت کے خلاف منتخب ترکی حکومت کا ساتھ دیا، جن میں آرمی چیف آف اسٹاف خلوصی آکار اور بحری، برّی اور ہوائی فوج کے کمانڈر بھی موجود ہیں۔ اِن لوگوں کے سیکولر نہ ہونے کا ثبوت اِس امر سے بھی ملتا ہے کہ ترکی کی سیکولرازم کی محافظ پارٹی بھی اِس بغاوت کے خلاف تھی اور فوجی جنرلوں اور افسروں کی برطرفی کے حق میں تھی۔ یہ لوگ ترکی قوم پرست پارٹی کے کارکن بھی نہیں تھے۔کیونکہ ترکی قوم پرست پارٹی کے لیڈر نے ۱۵ جولائی کو وزیر اعظم کے ٹی وی پر بیان کے ساتھ ہی یہ اعلان کیا کہ وہ اور اُس کی پارٹی اِس بغاوت کی سخت مذمت کرتی ہے، اور ہمارے صدر کے عوام کو سڑکوں پر بلاتے ہی قومی پارٹی کے کارکن احتجاج میں آگے آگے تھے۔ پھر یہ افسر اُن کے بھی پیرو نہیں تھے۔
اب اِس میں کوئی شک و شبہ نہیں رہا کہ یہ گولن دہشت گرد تنظیم کے کارکن تھے۔ ویسے بھی گرفتار ہونے والے جنرلوں اور افسروں نے بھی اِس کا اقرار کیا اور امریکا کے وفادار مہمان کے وفا شناس میزبان ایک امریکن جنرل نے یہ اعلان کیا کہ ترکی میں ہمارے دوستوں کی گرفتاریاں ہورہی ہیں۔
جبکہ گولن تحریک اور اِس خونی بغاوت میں ملوث فوجیوں کا تعلق اظہر من الشمس ہوا تو میں اب اپنے قارئین کرام سے یہ سوال کرنا چاہوں گا کہ چیونٹی کو مرتے دیکھ کر رونے والے ایک رحم دل قائد جن کو اُن کے پیروکار مہدیٔ زمانہ سمجھتے ہیں اور جہاں بھی اِس تنظیم کے امام تقریر کریں وہیں بین المذاہب ہم آہنگی اور بھائی چارہ، دنیا میں صلح و آشتی یا’’ صلح کُل‘‘ کی باتیں کرتے ہیں، اِس کثرت کے ساتھ ترکی فوج میں کیا کرتے ہیں؟ کیوں ’’صلح کُل‘‘کے اِن مبلغین نے ترکی فوج میں تقریباً تیس چالیس سال سے جائز یا ناجائز ہر قسم کے طریقے استعمال کرنے سے گریز نہیں کیا؟ میں ناجائز کی اور تیس چالیس سال کا ذکر اِس لیے کرتا ہوں کہ کل ہی ایک ٹی وی پروگرام میں ایک ریٹائرڈ آرمی وکیل کو سُن رہا تھا اور وہ کہہ رہے تھے کہ بذات خود ۱۹۸۶ء میں اُنھوں نے گولن تنظیم کے کارکنوں کی جانب سے کیڈٹ اسکولوں کے امتحانی سوالات کی چوری ہونے کے ثبوت ملنے پر مقدمہ دائر کرانے کی کوشش کی لیکن اُس وقت کسی نے بھی اِس طرف توجہ مبذول نہیں کی۔ اُن کا کہنا تھا کہ اگر ہم آخری دس سالوں کا بھی حساب لگالیں تو کم از کم چالیس پچاس ہزار فوجی اسکول کے طالب علم اِس تنظیم سے منسلک ہیں اور یہ پچاس ہزار کیڈٹ اسکولوں کے طالب علموں کے اسی فی صد کے برابر ہے۔اِس خونی بغاوت کے دوران کیڈٹ اسکولوں کے طالب علموں کی اِس بغاوت میں شمولیت کی ناکام کوشش بھی اِس امر کا ثبوت ہے کہ وہ ریٹائرڈ سرکاری وکیل کے بیانات سو فی صد سچ ہیں۔اب ترکی میں تمام فوجی ثانوی اسکول یا کیڈٹ اسکول بند کیے جائیں گے۔
ویسے بھی ترکی فوج کے سیکولر عناصر ۲۰۱۲ء میں ’’ایرگینیکون‘‘ نامی مقدمے کے ساتھ ہی بر طرف کیے گئے جن میں پرانے چیف آرمی اسٹاف جنرل ایلکیر باشبوغ اور دیگر جنرل بھی شامل تھے۔ پھر تحقیقات کے بعد ترکی حکومت کو یہ علم ہوا کہ یہ مقدمہ گولن تنظیم کی سازش تھی اور عدالت کو جعلی کاغذات اور گواہ پیش کیے گئے تھے تو وہ سب جنرل تمام الزامات سے بَری ہوئے اور رہا کردیے گئے۔پھر یہ بھی معلوم ہوا کہ اُس مقدمے کے سرکاری وکیل زکریا اوز بھی اِس سازش میں ملوث تھا تو وہ گرفتار ہونے سے پہلے ملک سے باہر فرار ہوگیا۔ اب قارئین کرام یہ سوچ سکتے ہیں کہ سیکولر افسروں کی بر طرفی سے گولن تنظیم کے جنرلوں کو کیا ملا؟ ملا تو جنرل اور دیگر اہم رینکوں کے عہدے! کیونکہ عسکری قوانین اور طریقہ کار کے مطابق ترقی ملنے والے نظام کی رو سے اگر سیکولر جنرل برطرف نہ کیے جاتے تو ناکام فوجی بغاوت کے کمانڈر کبھی بھی اِن عہدوں پر فائز نہیں ہوپاتے اور ریٹائر ہوجاتے۔
ترکی میں گولن تحریک کے متعلق مسائل ایسے پیچیدہ اور تہہ در تہہ ہیں، جس کے بیان کے لیے لکھنے بیٹھوں تو یہ ’’داستان امیر حمزہ‘‘ سے بھی طویل ایک داستان بن جائے۔
الغرض جنرل اور افسر گرفتار ہوئے یا برطرف کیے گئے کیونکہ اُن لوگوں نے ترکی کے منتخب حکومت کو معدوم کرنے کے لیے بغاوت کی اور ترکی عوام کا قتل عام کیا۔
ٹی وی چینل، پبلشر اور ریڈیو چینل بند کیے گئے کیونکہ وہ لوگ کم سے کم تین چار سالوں سے ترکی عوام کو صدر مملکت اور ترکی کی منتخب حکومت کے خلاف بغاوت کرانے کے لیے جھوٹی خبروں سے گمراہ کررہے تھے۔
میڈیا سے متعلق صرف سات افراد گرفتار ہوئے، وہ بھی نہ صرف ٹی وی چینلوں اور اخباروں میں ترکی کی حکومت کے خلاف پروگرام کررہے تھے بلکہ مغربی میڈیا اور حکومتوں سے ترکی سے متعلق اہم ترین سیکریٹ معلومات کو شیئر کررہے تھے۔
گولن اسکول اور تعلیمی ادارے وزارتِ تعلیم میں ضم کیے گئے کیونکہ اِن میں بچوں کی برین واشنگ ہورہی تھی۔
گولن تحریک سے متعلق ہسپتال اور ہیلتھ سینٹر وزارتِ صحت میں ضم کیے گئے کیونکہ اُن میں غیر قانونی کاموں کے ساتھ اِس تحریک کے لیے مادی مدد فراہم کررہے تھے۔ یہاں قارئین کرام سے اِس تنظیم کے ڈاکٹروں تک کی غداری کی مثال پیش کرنا چاہتا ہوں۔فوجی بغاوت کی رات ترکی کے دارالحکومت انقرہ میں لوگ زخمی شہریوں کو جھڑپ کے موقع پر بالکل پاس طرغوت اوزال اسپتال پہنچانے لگے، تو گولن تنظیم کے اِس اسپتال کے ڈاکٹروں نے اسپتال کی لائٹیں اور دروازے بند کرکے زخمیوں کا علاج کرنے سے انکار کردیا۔ بغاوت کے بعد جب اُن کو بر طرف کردیا گیا تو وہ لوگ اسپتال سے نکلتے ہوئے تمام طبی مشینری خراب کرکے اسپتال سے نکل گئے۔
ترکی کے منتخب صدر اور ترکی کی منتخب حکومت نے اپنے ملک اور اپنی قوم کے تحفظ کی خاطر کچھ لوگوں کے مطابق ’’بہت رحم دلی سے‘‘ اقدامات کیے۔ ترک حکومت کو یہ اقدامات کرنے ہی تھے اگر وہ یہ اقدامات نہ کرتی تو ترکی کے عوام اپنی حکومت کو کبھی معاف نہیں کرتے۔
آخر میں اُن تمام تجزیہ کار صحافی دوستوں سے یہ سوال کرنا چاہوں گا جو ماشاء اللہ ایک ہی سر چشمہ سے پھوٹنے والے اور ’’ کٹ اینڈ پیسٹ‘‘ کی صورت میں نقل ہونے والے الزامات مختلف اصحاب کی توسط سے قارئین و سامعین و ناظرین کو پہنچائے جارہے ہیں۔ آج جرمنی میں ترکی حکومت اور فوجی بغاوت کے خلاف ایک احتجاجی جلسہ نکالا گیا۔ جرمنی ارباب اختیار نے اِس کو روکنے کے لیے کافی قانونی مشکلیں پیدا کیں مگر اُن کو ناکامی کا سامنا ہوا لیکن جرمنی کی عدالت عظمیٰ نے یہ فیصلہ جاری کرکے پابندی عائد کی کہ اِس جلسہ کے دوران ترک جمہوریت کے صدر جناب رجب طیب ایردوان حاضرین سے ٹیلی کانفرنس کے ذریعے مخاطب ہوکر تقریر نہیں کرسکتے ہیں۔ لیجیے آپ کے یورپ کے حق بیان اور اپنی رائے کے اظہار کے انسانی اقدار؟ خیر مجھے علم ہے کہ آپ لوگ اِس کے لیے بھی کوئی جواز نکالیں گے یا سنی اَن سنی کریں گے لیکن کیا کیا جائے۔ ترکی میں ایک محاورہ ہے ’’اگر نمک میں بھی بو پڑگئی تو اِس کا کوئی علاج نہیں ہوتا!‘‘ لگتا ہے کہ عالمی میڈیا کے نمک میں بو پڑگئی ہے اللہ رحم کرے!
جناب خلیل طوقار نے نہایت تفصیل اور تمام پہلوؤں کو پیش نظر رکھتے ہوئے مسئلہ کی تمام جہات پر روشنی ڈالی ہے۔ بات مشرق و مغرب کے معیارات کی نہیں رہی، مغربی میڈیا اور اس کے زیرِ اثر ساری دنیا میں کسی بات کو حق اور کسی کو ناحق ثابت کرنا معمولی بات ہے۔ خرد کا نام جنوں رکھ دیا ، جنوں کا خرد۔ جو چاہیے آپ کا حسن کرشمہ ساز کرے۔ چنانچہ فی زمانہ صرف وہی سچ ہے، جسے مغربی میڈیا سچ کہتا ہے اور وہی ناحق ہے، جسے مغربی میڈیا ناحق کہتا ہے۔ ہمارے سامنے کشمیر، عراق، افغانستان، لیبیا، یمن اور اب ترکی کی مثالیں موجود ہیں۔ امید ہے کہ ڈاکٹر صاحب کی اس مفصل اور جامع تجزیے کے بعد اردو قارئین مسئلے کی نوعیت اور نزاکت سے خوب مطلع ہو گئے ہوں گے۔